Gipahitabo na usab ang Pa-Birthday ni Lolo ug Lola kaniadtong Hunyo 30, 2010 didto sa may Cabadbaran City Gym para sa mga tigulang nga nagsaulog sa ilang adlaw’ng natawhan sa bulan sa Abril hangtud Hunyo. Dili matukib ang kalipay sa mga tigulang nga nagpanuigon ug sisenta pataas nga taliwala sa gisaagubang nga kapit-os sa panalapi sa lokal nga panggamhanan gumikan sa hangtud karon wala pa maresolba nga kaso sa atong pagkasyudad, wala gayud gihunong sa liderato ni Mayor Dale B. Corvera ang tanan niining maanindot nga programa para sa mga senior citizens ning syudad. Kabahin na niini ang libreng bitamina sa adlaw-adlaw ug ang birthday party treat gikan sa Jollibee para sa mga senior citizens diin sila makatilaw sa lamiang pagkaon ug makahuyop ug ilang kaugalingong birthday cake nga aduna usab sayawan dinuyugan sa musika sa Cabadbaran City Band. Isip dugang pahalipay sa mga nagsaulog gyud sa ilang adlaw’ng natawhan niadtong mismong adlawa, mihatag si City Mayor Dale B. Corvera ug tag-500 pesos isip regalo kanila.

Usa sa pinakamaanindot nga balita nga gipaambit sa mayor atol sa maong kasaulogan mao ang iyang balita nga iya na nga gihatagan ug marching order ang City Social Welfare and Development Office nga gipagadumalaan ni Mrs. Joan A. Monding sa pagbuhat pa ug dugang mga programa nga mas mapalambo pa ang Senior Citizens Sector ning syudad. Kabahin usab niini mao ang paghangyo sa mayor sa katawhan nga motabang pag-ampo nga mahibalik na ang atong City IRA aron mapatuman na ang plano nga iubos pa ang edad sa mga tigulang nga makadawat sa P2000 Yearly Cash Incentives gikan sa 70 anyos ngadto sa 65 anyos sugod sunod tuig.

Si Mayor Corvera nga bag-o pa lamang usab nagsaulog sa iyang adlaw’ng natawhan adtong Hunyo 27 mihatag usab ug usa ka awit pahinungod sa mga birthday celebrators. Ang maong kasaulogan gitambungan usab sa mga bag-ong napiling mga opisyal ning syudad ug kadtong mga midaug pag-usab inubanan sa mga kapitan sa nagkalain-laing barangay.

To see more photos click here...